U retale Eskolim, chì addunisce 6 federazioni di scole immersive : corsa, basca, brittona, catalana, uccitana è alsaziana era in i penseri dopu à l’arrestatu di u Cunsigliu Custituziunale in quantu à a lege Molac. Quellu avia purtatu un colpu à l’abrivu datu da u votu magiuritariu di u Senatu è l’Assemblea Naziunale à sta pruposta. L’associ aspettavanu dunque chì u guvernu schjarisci a so pusizione.

Dopu à a mubilisazione forte forte di u mese di maghju è e manifestazioni urganizate in ogni rughjone à prò di l’insignamentu immersivu, in particulare assuciativu, u Presidente è u so Primu Ministru avianu palisatu a so brama di sustegnu à stu mudellu.

Mancava cunfirmazione di manera ufficiale è furmale. Hè stata fatta dapoi u mercuri 15 di settembre. I sei capimachja di u retale Eskolim, frà altri u Presidente di Scola Corsa Ghjiseppu Turchini, sò stati ricevuti in visiocunferenza dapoi Matignon in presenza di u Presidente di u Cunsigliu Esecutivu di a CDC Egidiu Simeoni è di i Presidenti di l’Uffizii di a lingua di i rughjoni cuncernati. Anu pussutu trasmette e so dumande à u Primu Ministru, Jean Castex, è a u ministru di l’Educazione Naziunale, Jean-Michel Blanquer.

Ognunu hà mintuvatu l’efficienza di l’insignamentu immersivu, rammintendu ch’elli crescenu annu per annu i so risultati ottimi. Di fatti stu mudellu d’amparera per immersione hè u solu chì permetti di fà sbuccià locutori bislingui cumpetenti è di sminuì a perdita di quelli capaci di parlà ste lingue dichjarate da l’UNESCO in gran periculu. Ùn si pò tandu accettà ch’ellu venga indebulitu stu mudellu. St’andatura deve esse valurizata è assigurata da pudè persegue u so sviluppu in un ambiu serenu è custruttivu.

U Primu Ministru hà annunziatu a creazione è a messa in anda prestu prestu d’un scagnu naziunale di cuncertazione in quantu à e lingue regiunale. Hà ancu dichjaratu a so vuluntà d’assigurà di manera furmale i mudelli d’insignamentu immersivu assuciativi. Ste dichjarazioni sò state cunfirmate da un cummunicatu di stampa in data di u 16 settembre 2021 (si veca in appicciu).

U capu di u guvernu hà aghjustatu ch’ella serà data di più impurtanza à e cullettività regiunali in a messa in opera di stu disputivu in l’anni à vene. Una manu tesa da aiutà à francà e trappule nate da l’arrestatu di u Cunsigliu Custituziunale, pattu è cundizione chì a parolla data ùn sia ripigliata è ch’elli seguitinu l’atti.