Scola Corsa hà per vucazione di federà l’inseme di e scole assuciative d’insignamentu immersivu chì portanu u so nome.

À ogni apertura d’una scola nova vene creatu da i genitori un associu cunghjuntu, affiliatu à u retale Scola Corsa. Sò elli chì guidanu u prugettu di a scola di i so figlioli.

Hè liberu ogni situ d’organizà a so propia animazione. L’associu lucale cura u spannamentu di cundizioni materiali vantaghjose per a scularità di i zitelli ; organizeghja manifestazioni da prumove a scola è è arreca u più pedagogicu ch’ellu brama, in cuncertazione cù l’insignanti è a cuurdinazione di a federazione.

Da a rientrata di settembre 2021 sò stati aperti i dui primi siti in Bastia è in Biguglia. À partesi da settembre 2022 collanu e coorte d’annu d’un livellu superiore è apre una scola nova in Sarrula è Carcupinu.

Scola Corsa hè un associu gestitu da a lege di 1901 chì u scopu hè non lucrativu. Aderisce à u retale Eskolim di scole assuciative d’insignamentu immersivu.

Un cunsigliu d’amministrazione di 23 membri assesta i so travagli, sustene e scole di modu giuridicu è finanziariu, è guida u seguitu pedagogicu affullendu l’insignante(i).

Ste scole sò laiche è gratuite pè i parenti chì venenu solu sullicitati da aderisce à l’associu (participazione annuale di 10 €.) Ponu dinù, s’elli a volenu, arricà un sustegnu liberu a prò d’un funziunamentu ottimizatu di l’associu federativu chì addunisce tutte e scole.

Compiu u periudu prubatoriu di trè anni, u ministeru di l’Educazione Naziunale cunsente una cunvenzione à e scole assuciative d’insignamentu di u retale Eskolim, pigliendu in carica a paga di l’insignanti.

Scola Corsa ne puderà benefizià è ne serà crisciuta a so capacità à apre altre scole.

Allocch’è à tandu, s’autofinanzeghjanu e scole cù u suvvenziunamentu istituziunale (sustegnu di e cumune o di a Cullettività di Corsica), u mecenatu d’intraprese è i so fondi propii buscati cù l’adesioni è i doni di a ghjente.