Addunita per u so bilanciu anuale, Scola corsa pò ralegrassi di i so belli risultati. L’ingagiamentu di a CdC hè cunsulidatu, e merrie partinarie cuntinuveghjanu à sustene di manera efficace à Scola corsa, u slanciu pupulare s’arradicheghja è u metudu immersivu hà risultati eccellenti. Scola corsa cuntinuveghja u so sviluppu…
Lettura : 6 mn
L’ambienza era alegra per l’assemblea generale di Scola corsa chì s’hè tenuta à a Casa di e lingue, stu mercuri 23 d’aprile. U prugettu avanza è Scola corsa cuntinuveghja u so sviluppu.
I dibattiti anu purtatu nantu à u bilanciu di l’annata scorsa, ma dinù nantu à i prugetti à vene.
Jeanne Julien, Ghjiseppu Turchini, Anna Catalina Santucci è Fabiana Giovannini durante u spostu di u raportu murale di Scola corsa
Effettivi in crescita
U prugettu di scole immersive in corsu hè natu in u 2021 in e cumune di Biguglia è Bastia. Quattru anni dopu, simu digià luntanu di u pugnucciu di zitelli di a prima rientrata. Oghje, ci sò 146 sculari chì frequentanu i banchi di Scola corsa. E dumande di scrizzione duverianu permette di francà u sciffru simbolicu di 200 scritti à a rientrata sculare 2025.
Oramai sò 73 elevi in Bastia, 43 in Biguglia. A scola di Sarrula, pè u so terzu annu di funziunamentu, hà arregistratu a scrizzione di zitelli novi è u so effettivu hè crisciutu à 14 elevi. In Corti cuntemu 16 elevi. Tocca a prussima rientrata, un situ novu hà da apre in Lucciana
« A vuciata cresce è funziona ind’è i parenti… Si dice chì, in più di l’amparera di u corsu, facenu ste scolezitelli felici », dice un participanete à l’AG. In l’assistenza si surride…
In parallelu – è ùn ci stupimu – e squatre pedagogiche crescenu anch’elle. Cinque insignante sò state riclutate in u 2022-23, eranu ondeci in u 2024-2025. L’assistente materne elle passanu da sette à dodeci, cun briu, senza cuntà ch’ellu cresce u numeru di l’intervenenti è animatori.
Fatta fine, integrandu i persunali amministrativi, ci sò 27 persone chì sò impiegate da Scola corsa.
A prugressione di u numeru d’elevi scritti in e scole Scola corsa hè u testimoniu di a ricunniscenza suciale di u prugettu
A pedagugia di l’immersione tene e so prumesse
Al dilà di i sciffri, hè a pedagugia stessa chì hè una riescita. Risponde à una logica di co-custruzzione è di co-amparera. Rende attivu l’elevu. Perchè chì aldilà di l’acquistu di sapè sculari classichi, prova di sviluppà a cunfidenza in sè, u cumpurtamente suciale è a presa di decisione di u zitellu.
« U metudu immersivu pruduce risulati chjari è cunvincenti. I test sculari fatti in e scole dimostranu risultati eccellenti in corsu è si situeghjanu in una bunissima norma per ciò chì tocca à l’altre discipline », cuntinuveghja u presidente di seanza. « In a pratica orale rilaziunale, l’elevi adopranu a lingua corsa trà d’elli à capu di qualchì mese di scularizazione è i più maiò cuntinuveghjanu di strutturà una spressione linda è pertinente. »
Dop’à quattru anni di messa in pratica, a pedagugia di Scola corsa hè di più in più acconcia. Hà dinù pruduttu ducumenti pedagogichi ineditti chì aiutanu à l’amparera in corsu è chì sò adatti pè i CP è CE1. In quant’à i sapè fà, assuciati à a pedagugia Scola corsa, facenu u casu d’una trasmissione ind’è i stazianti di l’INSPE di Corsica (a scola di i maestri) chì i nostri siti di Sarrula, Biguglia è Bastia accoglienu.
Oramai, a porta hè aperta à parechji cuntatti cun l’Istitutu superiore di u prufessuratu di è di l’Educazione in vista di partinariati futuri.
Oramai a porta hè aperta à parechji cuntatti cun l’INSPE in vista di partinariati à vene. Jean-Pierre Luciani, cunsiglieru pedagogicu è membru di u cunsigliu d’amministrazione di Scola corsa a dice : « a pruspettiva à vene d’una cuntrattualizazione cun l’Educazione naziunale sbuccerà di fatti nant’à una messa in cumunu di cumpetenze è di logistiche cun l’autorità universitarie ».
Piccula riserva : a furmazione di i maestri à sta pedagugia ùn hà pussutu apresi quist’annu. L’Associu pè a furmazione prufessiunale di l’adulti (Afpa), chì ne assigurava l’appoghju logisticu, dumanda un numeru minimu di sei participanti. Ùn ci simu ghjunti sta volta. Ma, cù u travagliu è cù a pace, l’abbundanza ancu si face. A ci pruveremu un’altra volta.
U motu sucetale si rinforza è si cunferma
Invece, u slanciu motu sucetale si rinforza. L’associ lucali chì adduniscenu i parenti d’elevi è chì inguatranu di manera efficace l’andatura di e so scole rispettive, dinamizeghjanu a dimarchja cum’ella si aspetta da elli.
Ghjiseppu Turchini, ammenta e centinaie di persone venute à sente u cuncertu di i Spice Boys, in sustegnu à a dimarchja immersiva. In a sala, un’altra voce si face sente pè rammintà un altru cuncertu, organizatu da Michè Dominici chì hà addunitu una mansa d’artisti à prò di Scola corsa. À ogni manifestazione o cunferenza, u publicu hà rispostu presente. Cusì, u slanciu si rinforza ogni volta appena di più.
U puntu chjave : i soldi sò suldati
Di l’avvene, chì ne serà ? E pruspettive di Scola corsa cunsistenu à stende u retale di e scole immersive nant’à tuttu u territoriu regiunale. À st’affirmazione, Ghjiseppu Turchini aghjusta, realistu è cunfidente : « in a misura di i mezi ch’ella averà a federazione ».
Oghje, a cunvenzione plurianuale di a CdC è chì hè stata vutata à l’unanimità, copre 70 % di u bugettu di Scola corsa. L’impegnu di a CdC si cunferma.
Venute pè rapresentà a merria di Bastia è quella di Biguglia (mettenu à dispusizione i so lucali), Ivana Polisini è Muriel Beltran anu turnatu à accertà u sustegnu di a so municipalità à a dimarchja Scola corsa. L’aiuti accurdati da e merrie rapresentanu 10 % di u bugettu
Eppuru, l’autofinanzamentu deve esse di 20 %. Hè da veru una sfida pè un bugettu simule. Ma u fattu di pudè benefizià d’una deduzzione fiscale contr’à un donu hè oramai pussibule. Hè u casu pè i particulari è l’intraprese per via di u mecenatu. I doni sò defiscalizati à l’altura di 66 % pè i primi è 60 % pè i secondi.
L’inghjocu si cuncentra nant’à a cuntrattualizazione aspettata cù u Statu. Cù a firma di stu cuntrattu, u Statu piglierà in carica a paga di l’insignanti
D’altra parte, l’inghjocu pè u sviluppu di u retale Scola corsa si cuncentra nant’à a cuntrattualizazione aspettata cù u Statu. Cù a firma di stu cuntrattu, u Statu piglierà in carica a paga di l’insignanti. A difficultà hè chì sta cuntrattualizazione ùn pò esse ch’è prugressiva, classa per classa, un annu dop’à l’altru (nota : Qualchì ghjornu dopu à l’assemblea generale, u Statu hà cunvalidatu a cuntrattualizazione di dui posti d’insignanti, unu in Bastia, l’altru in Biguglia).
Un slanciu pè a ricunniscenza naziunale di Scola corsa
Al dilà di u panorama isulanu, Scola corsa ottene una ricunniscenza à u livellu naziunale. Presidente di Scola corsa, Ghjiseppu Turchini vene d’esse elettu presidente d’Eskolim. Cusì, u votu à l’unanimità di i sei rapresentanti di u retale di e scole immersive in Francia (bascu, brittonu, catalanu, occitanu, alsazianu, corsu) saluta u travagliu fattu da a Federazione in qualchì annu. Hè dinù un slanciu versu a ricunniscenza di a vitalità di Scola corsa à u livellu di u Statu.
Sprunati da stu bilanciu pienu di prumesse, l’aderenti di Scola corsa sò quantunque firmati lucidi. Sì a tacca ch’elli anu pigliatu in carica hè fundamentale, ferma titanesca.. Ma strada facendu s’acconcia a soma …