Scola corsa cuntinueghja à traccià a so via. È cù l’adattabilità originale di i so cuntenuti, u retale assuciativu deve cuntinuà à ghjucà u rollu emulativu ch’ellu hà indiatu fin’à avà è vene in cumplementarità di laboratoriu avanzatu riguardu à u serviziu publicu...
Lettura 9 mn
Scola Corsa hà digià quattru anni. S’appronta à cinquèsima rientrata. Cumu si portanu e vostre scole ?
- Scola corsa cuntinueghja à traccià a so via, cù un ritimu di criscenza apprezievule è pigliendu cura à ùn fà u passu più maiò ch’è a infurcatura. Sò primurosi tanti parametri : a qualità di l’insignamentu, u so cuntenutu, u riclutamentu è a furmazione di l’insignanti è di l’aiute materne, a gestione cuntabile, l’aspetti amministrativi… U prugettu hè passiunante è ci dumanda assai esigenza ma hè una suddisfazzione cutidiana di gode i risultati acquisti. Zitelli spannati, perfettamente bislingui, aperti à d’altre culture, agenti dinamizanti di u so ambiante famigliale è sucetale, dimarchja aperta nant’à e prublematiche patrimuniali è ecunomiche di l’isula : eccu i veri mutivi di cuntintezza. Tengu à rende omagiu dinù à l’investimentu di u persunale è di i parenti chì si danu di rimenu pè cuntribuisce à a qualità di u nostru dispusitivu.
À chì ne simu oghje, quantu zitelli ? Quantu maestre è aiute materne ? Senza cuntà l’amministrativi… site una vera impresa avà !
- Ad oghje cuntemu 11 maestre-i è 12 aiute materne. Averiamu da passà da 26 impiegati (cù e trè cullaburatrici amministrative attuali) à 32 quist’annu chì vene. Sò 147 l’elevi di e nostre quattru scole (Bastia, Biguglia, Corti è Sarrula è Carcupinu) è trabarcheremu i 210 di settembre chì vene.
Sò aperte e scrizzioni pè a prossima rientrata… cunterà un’antra scola u retale ?
- Sò aperte e scrizzioni nant’à ogni situ. Si ponu buscà e infurmazioni nant’à i retali o piglià cuntattu cù a nostra direttrice amministrativa è pedagogica à u 06 29 65 76 42. Per altru, difatti, emu annunziatu di cuncertu cù a municipalità di Lucciana a creazione d’un situ novu nant’à a cumuna. Simu propiu felici di sta cullaburazione. A squatra municipale luccianinca ci accoglie cù dispunibilità è entusiasimu. Ch’ella ne sia ringraziata quì. Simu in traccia d’ingiardinà un prugettu pedagogicu ricchissimu à paru à u patrimoniu storicu è culturale di stu bellu territoriu.
Principia ormai una segonda fasa di u nostru sviluppu chì deverà esse inquatratu da un statutu legale securizatu, cù un un pattu istituziunale chjaru trà i servizii di u Statu è di a CdC chì cuntinueghja à puntellà a dimarchja.
À chì ne simu di a cuntrattualizazione ch’ella aspettava a Corsica per dà una dinàmica più forte d’apertura di scole ?
- Vene d’esseci cumunicata a bunissima nutizia da l’ISLRF è da u rettore di l’Accademia : ci hè stata accurdata da u ministeriu di l’EN una cuntrattualizazione anticipita d’un annu pett’à i cinque abituali di u periudu dettu prubatoriu. Porta nant’à dui posti, unu in Bastia è un antru in Biguglia, prime scole di u retale. A interpretemu cum’è a ricunniscenza di u nostru travagliu fundiu è a valurizazione di a qualità pedagogica messa in opera in e nostre classe. Hè dinù un segnu puliticu forte postu chì u passeghju sott’à cuntrattu cù l’Educazione Naziunale ci integra à u dispusitivu accademicu. Simu digià in una logica di leale cullaburazione postu chè n’accugliemu stazianti di l’università è chè no rispundimu à l’attese esigite da l’auturità. Principia ormai una segonda fasa di u nostru sviluppu chì deverà esse inquatratu da un statutu legale securizatu, cù un un pattu istituziunale chjaru trà i servizii di u Statu è di a CdC chì cuntinueghja à puntellà a dimarchja. Cù l’adattabilità originale di i so cuntenuti, u retale assuciativu deve cuntinuà à ghjucà u rollu emulativu ch’ellu hà indiatu fin’à avà è vene in cumplementarità di laboratoriu avanzatu riguardu à u serviziu publicu.
Parlemune : in u pùblicu, s’àprenu di più in più e scole immersive dinù. È e parulle di u rettore pàrenu… rivuluziunarie, nò ? Chì ghjè a sfarenza trà pùblicu è assuciativu ?
- Aviamu scuntratu u sgiò Rettore dop’à a so numinazione è ci avia subitu palisatu e so ambizioni pusitive inquant’à u sviluppu di u dispusitivu bislinguu è ancu immersivu in l’Accademia. Ci rallegremu propiu di stu cambiamentu di scala è di u discorsu decisu chì u porta. Quattru anni fà, l’immersivu apparia cum’è un furmatu cunfidenziale ; oghje, hè à u centru di tutti i ragioni. Forse ci seremu per qualcusella. St’ogettivi ripresentanu una scumessa chè no devimu tuccà tutti inseme : si tratta di mubilizà e risorse esistenti, di creà un vivaghju di futuri insignanti è di riesce à fà cresce u dispusitivu quantitativamente è qualitativamente cù una valutazione permanente di l’ernesi messi in anda. U Publicu ferma in a so cunfigurazione di sperimentazione cù un’immersione chì pò andà da 50 à 70% di u tempu sculare. L’autunumia di u nostru retale prupone, ellu, un’immersione integrale sin’à u CE1 induv’ellu vene intruduttu u francese dop’à l’amparera fundamentale di a scrittura è di a lettura. L’aiute materne, e cantinaghje è l’intervenenti, tutti cursofuni ghjocanu dinù un rollu essenziale. Hè stu furmatu quì chì hà fattu e so prove dapoi tant’anni ind’è i nostri amichi d’Eskolim è pruduttu generazioni sane di perfetti lucutori asgiati in parechje lingue. Hè propiu essenziale ch’ellu cuntinuessi à cresce.
U cartulare priuritariu ch’ellu ci vole à purtà hè quellu di a securizazione di l’insignamentu immersivu assuciativu.
Appuntu, Scola Corsa vince dinù in rinommu à l’infora… postu ch’hai pigliatu a presidenza di Eskolim à l’ùltima adunita generale. Spiècaci un pocu ciò ch’ellu hè Eskolim è i to prugetti…
- Hè ghjusta. I cinque altri retali anu purtatu u nostru à a presidenza di a federazione Eskolim. Quì dinù, hè una testimunianza maiò di cunfidenza è di stima chì ci hè accurdata. Sta presidenza ci onureghja propiu è ci impegna altrettantu. Circheraghju à esse u degnu ripresentante di i mo pari durante u periudu di respunsabilità chì s’apre. U cartulare priuritariu ch’ellu ci vole à purtà hè quellu di a securizazione di l’insignamentu immersivu assuciativu. Dopu à l’aduzzione di a lege Molac à l’Assemblea Naziunale, paradussalamente, s’hè andatu indietru cù un arrestatu di u Cunsigliu Custituziunale assai custringhjente chì ripresenta una vera spada di Damuclè suspesa sopr’à i nostri capi. Una cumissione parlamentaria hà currettu stu testu cù una circularia detta « circularia Castex » chì, per avà, ci rege da riferimentu quatru ma chì pò esse rimessa in causa à ogni istante. Altri punti impurtanti : u versamentu di u furfettu sculare da e merrie, l’armunizazione di e cundizioni di carriera cù u Publicu, a presa in contu di l’elevi cun dificultà… hè longu u listinu di i prugressi chì si fermanu da fà.
Cosa hè u bilanciu di sta federazione, crèscenu e scole culandi dinù ? Perchè hè impurtante di firmà in lea cù tutte st’iniziative ?
- Eskolim, à tavers’à i so sei retali scularizeghja 14 244 elevi, da a materna sin’à u liceu in 188 stabilimenti (168 scole, 16 cullegi è 4 licei). Sò edifichenti i risultati d’un mudellu pedagogicu chì stimuleghja i parangoni linguistichi, e virtù cugnitive cerebrali è l’apertura à prublematiche universali nobili. I parenti sanu oramai chì u bisllinguisimu hè una carta maestra pè i so figlioli è ch’ellu pruduce un’ammaistrera più soda di u francese. Quessa aprovanu i risultati ottimi à u bascigliè ottenuti ogni annu da i licei d’Eskolim. Sò primurose e nostre leie cù i nostri amichi chì ci facenu benefizià di a so sperienza pedagogica, logistica è amministrativa, vechja di 50 anni per certi.
Sò edifichenti i risultati d’un mudellu pedagogicu chì stimuleghja i parangoni linguistichi, e virtù cugnitive cerebrali è l’apertura à prublematiche universali nobili.
Eppuru, ùn si pò ancu dì chì a nostra lingua hè salva… Chì ghjè a situazione oghje, crescenu i locutori ? U bislinguìsimu in a sucetà ? Cosa ci manca per sbuccalla in veru ?
- Ùn piattemucila : a lingua nustrale hè in rinculu. A pratica famigliale è sucetale ùn sò più quì cum’è 50 anni fà da assiguralli una sparghjera naturale. Ciò dettu, regioni cum’è a Catalogna, u Paese bascu o u Paese gallese per u indettu ci insegnanu chì a rivittulita di lingue minuritarie minacciate riesce più ch’è bè quand’omu si dà i mezi di guidalla. A scola hè u fundiale di sta pulitica publica ma ùn basta s’ella hè sola. A ridinamizazione di i i parleti nativi deve esse purtata da stituzioni publiche cum’è un offiziu di a lingua chì esiste dapertuttu è move pianificazioni sinnute. Quì dinù, d’altri ci anu apertu a strada, basta à ripruduce ciò chì hè statu efficace altrò : media, televisione, radiu, retali suciali, amministrazione, mondu pulticiu, assuciativu, spurtivu, ecunomicu, creazione culturale, literaria, teatrale, cantu, affissame publicu, signaletica : ogni settore è ogni cumpunente di a sucetà deve esse puntellatu in u so impegnu. Infine, e tecnulugie nove, l’ernesi muderni di traduzzione, dizziunarii in cuntestu, scrittura intutitiva, etc, devenu esse accessibili à tutt’ognunu. Finiscu cù u rollu ch’ella deve acquistà a lingua corsa in a cumunicazione internaziunale ; una lingua latina cum’è a nostra ci apre à più d’una migliarda di lucutori in lu mondu sanu. Avemu pane è cultetalla da riesce !
Chì sò i prugetti per andà più in furia è di manera più efficace, è cosa dèvenu fà i nostri lettori per susteneli ?
- A prima cosa hè di parlà a lingua. D’ùn aspettà sempre ch’elli fianu e strutture offiziali. A segonda hè di riclamà una pulitica linguistica puntellata è energica. In ciò chì cuncerna à Scola corsa, apprufittu di u vostru gentile invitu da lampà a nostra tradiziunale chjama à i sottuscrittori chì ci aiutanu da u principiu, ringrenziendula una volta di più. Cresce annu per annu u nostru bugettu è ci tocca à assigurà più ch’è mai i 30% di cofinanziamentu chersi da a lege, sottulineendu a manna cunseguente di a CDC (70%) è di e merrie chì ci aiutanu (10%). Intraprese è particulari ci devenu stà à latu per peerennizà una dimarchja plebiscitata da a sucetà è chì hè una vera offerta di serviziu publicu laicu è apertu à tutti, di qualsiasi mezu suciale o origine. À ognunu addirizzemu un calurosu ringraziu in anticipu !