Una serata indimentichevule… Scola corsa manda mille ringrazii à tutti quelli chì si sò impignati
Trecentu persone è più, sabatu scorsu, in Pedicroce, anu cuntribuitu à rivittulisce l’anima di sta Castagniccia prufonda è eterna chè no tenimu cusì caru. À l’iniziativa d’unipochi di giovani mastini guidati da Ghjuvan Camellu Pasquali è da Petru Francescu Ucciani, ci s’hè svolta una serata indimentichevule. Ùn fubbe abbastanza maiò a chjesone di u paese da accoglie a ghjente accorsa à assiste à un cuncertu di sulidarità organizatu à prò di Scola corsa è di l’associu lucale Santa Maria. Un incantu musicale è vucale cun tanti artisti cum’è Sergiu Vacca, Luigi Crispi, Jonathan Juste, Francescu Emmanuelli, Ghjuvan Micaellu Mattei o a Scola di cantu di l’Adecec, prulungatu da un cambiu festivu ingir’à robba spartuta è canti allegri.
Simu propiu unurati d’esse stati scelti da associu benefiziante d’una mossa simule chì purtava sensu
Scola corsa manda mille ringrazii à tutti quelli chì si sò impignati da fà di sta stonda di spartera è di cultura viva una splendida riescita è chì l’anu offertu una ricetta di più di 4000 euri.
Simu propiu fieri è unurati d’esse stati scelti da associu benefiziante d’una mossa simule chì purtava sensu, garbu, estetica è visione d’avvene prulifica. Un primu appuntamentu chì ne chjamerà d’altri, s’è cusì a sorte vole.
