Oghje u Statu deve piglià in contu e rivendicazione di Scola Corsa – Federazione. Sò sustenute da una mubilizazione tamanta di a sucetà corsa, in tutte e so cumpunente. Sianu ringraziati tutti quelli chì sò ghjunti à purtà u so sustegnu !
U prefettu di Corsica hà pigliatu nota di e nostre dumande è hà prupostu una reunione di travagliu a settimana chì vene, ma hè u guvernu chì deve purtà e risposte.Serà sullicitatu ind’i ghjorni à vene da u deputatu di u primu circondu di Corsica suprana. Speremu un’esciuta rapida è pusitiva à sta crisi.
A lingua corsa hè u core di a nostra identità
A lingua corsa hè u core di a nostra identità, hè dinù un patrimoniu ricunnisciutu da a custituzione francese cum’è l’altre lingue regiunale.Ùn si pò imaginà una segonda chì u mudellu di virtù, di sacrifizi à prò di u bè cumunu, è d’eccellenza ind’a tramandera di a lingua ch’ella hè Scola Corsa sia tombu. Ùn seria nè ghjustu, nè murale, nè accettevule.
Ùn si pò cuncipì chì l’impegnu di a squatra assuciativa, di a squatra pedagogica, di i parenti, chì u sustegnu di e cullettività, di l’imprese è di i particulari chì ci finanzanu ùn sia pigliatu in contu. Ùn si pò sente chì ciò chì esiste in altrò ùn sia pussibule quì.
Inseme l’emu da sbuccà
Un ringraziu maiò à tuttu u mondu pè avè fattu di sta ghjurnata di mubilizazione d’oghje un successu francu è ampiu : parenti, militanti, stitutrici è aiute materne, impresarii, culturali è simpatizanti d’ogni obedienza. 1000 personne in Bastia, 800 in Aiacciu : dimustrazione hè stata fatta ch’ella hà rispostu à a chjama di Scola corsa a sucetà isulana sana.
Ne deveranu tene contu l’auturità è ùn seranu più listesse e cose ormai. Stiamu tutti mubilizati sintantu ch’elli ùn seranu dati i segni aspettati : cuntrattualizazione generalizata d’11 posti, suluzioni perenne di securazione di u retale, garanzie inquant’à a prucedura di u Tribunale amministrativu. A risposta, tocca à u Statu à dalla, a balla hè in u campu di Parigi. Delegazione hè stata data à u deputatu di a prima circuscrizzione da sullicità u primu ministru da dumane. Per altru, hà annunziatu u prefettu ch’ella si tenerà una prima riunione quatripartita a settimana chì entre. Vi feremu parte di l’avanzate di a situazione manu à manu. Serenità, determinazione è fede. Inseme l’emu da sbuccà !
