Scola Corsa à l’accorta

UNA SCOLA

Aperta à tutte, à tutti, laica è gratisi
In un ambiu tuttu cursofunu

E scole Scola corsa formanu un retale di quattru scole in Corsica (Bastia, Biguglia, Corti, Sarrula è Carcupinu) addunite in una federazione. Stu retale assuciativu scularizerà 220 elevi à a rientrata 2025, chì viderà l’apertura d’una quinta scola in Lucciana. Un associu di parenti d’elevi vene in appoghju à ogni scola. Cullabureghja cù a squadra pedagogica pè assigurà u funziunamentu bonu di u stabilimentu. E duie prime scole sò state aperte in Bastia è Biguglia in u 2021 cun duie classe materne. Tutti l’anni, e scole di Scola corsa s’arricchiscenu d’un livellu. Oghje l’elevi i più maiò seguitanu corsi di CE1. À stu ritimu, u primu cullegiu in immersione viderà u ghjornu in u 2028.

U scopu di Scola Corsa hè di furmà e prussime generazione di lucutori chì adupreranu di manera naturale a lingua corsa, è di rende abituale a pratica di u plurilinguisimu in tutte e situazione.

Insignamentu gratisi è laicu, un scola cum’è l’altre

L’insignamentu hè gratisi, laicu, apuliticu è apertu à tutti. E scole pruponenu un insignamentu in immersione, chì porta l’elevi à un’ammaistrera cumpletta di u corsu è di u francese, à l’orale cum’è à u scrittu. L’insignanti seguitanu i prugrammi ufficiali stabiliti da l’Educazione naziunale è sò ispettati cum’è quelli di l’insignamentu publicu è privatu.

I parenti sò partenarii di u prugettu educativu di e scole, a pedagugia ferma a prerugativa di e squadre educative. E cullettività lucale sò anch’elle partenarii di primura di u retale

L’insignanti seguitanu i prugrammi ufficialie stabiliti da l’Educazione naziunale è sò ispettati cum’è quelli di l’insignamentu publicu è privatu.

Prugettu pedagogicu

Da a matina à a sera, l’elevi sò in un bagnu di lingua tuttu cursofunu.
Hè cusì pè i corsi ma dinù per l’altri mumenti cum’è a cantina, a guarderia, l’animazione o e surtite sculare…
In una logica di co-custruzzione è di co-amparera, a pedagugia aduprata à Scola Corsa rende attivu u zitellu. Hà cum’è scopu di sviluppà e cumpetenze accademiche, ma dinù a cunfidenza in sè, u cumpurtamente suciale serà presa di decisione. Cusì, i zitelli sò dinù invitati à seguità attività di scuperte perisculare : musica, cantu, scacchi, giardinera, sport, inglese…

U prugettu educativu hà cum’è scopu di sviluppà e cumpetenze accademiche, ma dinù a cunfidenza in sè, u cumpurtamentu suciale è a presa di decisione.

Bugettu : l’autofinanzamentu hè assiguratu da i doni

Oghje, cun 4 stabilimenti è 9 classe, l’ecosistema di u retale Scola corsa currisponde à un bugettu annuale di 1,4 milioni d’euri. Stu bugettu duverà stabilizassi malgradu l’apertura prugressiva di stabilimenti novi è di scole nove.

Di fatti, i stabilimenti Scola Corsa sò in attesa d’un cuntrattu d’assuciazione cun l’Educazione naziunale. U Statu impone cinque anni d’eserciziu à u minimu nanzu di firmà stu cuntrattu. Grazia à questu quì, e paghe di l’insignanti seranu di manera prugressiva pigliati in carica, stabilizendu u muntante di a cuntribuzione di i dunatori è istituzione regiunale chì sò, è firmeranu essenziali pè perennizà a nostra struttura.

A Cullettività di Corsica assigura oghje 70 % di u finanzamentu necessariu di u funziunamentu di Scola Corsa. 10 altri percenti sò dati da e cullettivà lucale partenarie. Scola Corsa s’autofinanza à l’altura di 20 %. Stu finanzamentu hè fattu di dunatori, persone o intraprese chì volenu assuciassi à a dimarchja è sustenela.

A Federazione Scola corsa hè aggradita da u ministeru di e Finanze, ogni dunatore pò benefizià d’una reduzzione fiscale à l’altura di 66 % di u muntante di u so donu.

In cumplementu, ogni scola puntella u so finanzamentu à l’attività organizate da l’associu lucale : animazione culturale, cunviviale o spurtive. Cusì, l’associ di parenti racoglienu i soldi chì cuntribuiscenu à a gratuità di l’insignamentu.

Ogni dunatore pò benefizia d’una reduzzione fiscale à l’altura di 66% di u muntante di u so donu

Creazione d’impieghi

A missione educativa è a trasmissione di a lingua corsa hè oghje assigurata da 26 prufessiunali impiegati da a Federazione Scola Corsa : furmatrice è furmatori, aiute materne, trè impiegate amministrative cumplettanu u dispusitivu. Toccu settembre 2025 seranu à u minimu 6 impiegati novi chì seranu necessarii da pudè assigurà a crescita di l’effettivi è accoglie i zitelli novi.

Adesione pupulare è sustegnu sucetale

Dapoi u so lanciamentu in u 2021, Scola Corsa benefizieghja d’un’addesione pupulare impurtante, u sustegnu sucetale s’hè manifestatu cusì à traversu una prima campagna riesciuta di crowdfunding. Oghje, brama di sviluppà u so retale per sparghje a so offerta educativa nant’à l’inseme di u territoriu.