Hè stata vutata à l’Assemblea Territuriale di Corsica a subvenzione accurdata à l’associu Scola corsa
Temps de lecture : 2 mn
Venneri scorsu, u 25 di lugliu di u 2025, hè stata vutata à l’Assemblea Territuriale di Corsica a subvenzione accurdata à l’associu Scola corsa pè l’ecerciziu 2025-2026. Oltre l’interventi preliminarii di e cunsigliere Nadina Nivaggioni è Lisa Tramoni, u raportu hè statu presentatu da u Presidente di l’Esecutivu ellu stessu. Una volta di più, cum’è da l’iniziu di l’esistenza di a nostra dimarchja, hè stata raghjunta l’unanimità di tutti i gruppi pulitichi riprisentati in l’emiciculu.
Tenimu à ringrazià a magiurità pè u so fidu sustegnu è l’impegnu argumentatu ch’ella hà sempre palisatu, ogni furmazione pè a so cunfidenza rinnuvata è l’intervenenti pè a qualità di i prupositi.
Vidimu in st’accunsentu generale a ghjusta ricumpensa di u travagliu realizatu fin’à oghje è a qualità di i risultati ottenuti d’altronde valitati da a recente cuntrattualizazione cù u Statu, accurdataci d’aprile scorsu.
Cun 35 impiegati à a rientrata di settembre, 5 siti è 220 elevi, u retale piglia suchju è s’arradicheghja in u paisagiu educativu è sucetale corsu, incarnendu un furmatu pedagogicu efficiente apitu à spannà a lingua nustrale ind’è e generazioni di dumane.
Da pudè finanzià stu dispusitivu criscente, u sussidiu attribuitu trapassa u milione d’euri. A somma hè maiò, quant’ella hè maiò a parte d’autofinanziamentu di 300 000 euri da buscà per cumplettà u bugettu previstu. Una volta di più a participazione di l’imprese è di i particulari vene essenziale. Scola corsa lampa a so solita chjama da sullicità à tutt’ognunu, picculu o gran dunatore, à aiutacci, ringraziendulu calurusamente in anticipu.
Cum’è da u principiu, perseguiteremu cun custanza è sennu à sviluppà u nostru mudellu, circhendu à ùn dillude a cunfidenza chì ci hè stata accurdata.
Inseme, più ch’è mai, spannemu a nostra lingua !