ASSICURÀ U SEGUITU SCULARE di u so figliolu
Avete sceltu à Scola Corsa pè i vostri figlioli, ma vi dumandate cumu assigurà u seguitu sculare. Sta rubrica hè fatta per voi.
I parenti d’elevi devenu parlà corsu di precettu ?
Bella sicura, hè sempre megliu quandu i parenti o i babboni è mammoni (o caccari è caccare!) ammaistreghjanu a lingua. Ma ùn hè micca indispensevule. U più impurtante, pè u zitellu, hè a mutivazione è l’incuragimenti ch’è vo li purterete, spieghendu a vostra scelta di prugettu educativu. Siate fieri di ciò ch’ellu face u vostru figliolu, mustrateli chì i so prugressi vi facenu piacè. L’insignanti è l’altri parenti sò anch’elli presenti per purtavvi aiutu è cunsigliu.
Cumu assicurà u seguitu sculare s’è no ùn cunniscimu micca u corsu ?
Ùn sapete micca parlà corsu ? U vostru figliolu ellu, u capisce è pò restituivvi u so travagliu in a vostra lingua. S’è vo vulete assicurà a capiscitura d’una lezzione di scola, pudete furmulà di manera semplice in francese ciò chì u vostru figliolu hà ritenutu è forse aiutallu in francese. Ella / ellu saperà traspone in corsu e spiegazione ch’è vo li avete datu in francese (o in un altra lingua).
In una situazione simile, u zitellu hà una spertizia nant’à qualcosa chì i so parenti ùn ammaistreghjanu micca. Ci hè di chè esse scumpaginati, ma di fatti, hè bè pè u zitellu d’avè cose à amparà à i so parenti.
U trasferimentu d’una lingua à l’altra chì si face di manera automatica hè sempre qualcosa di magicu !
È s’o amparava u corsu, anch’eiu ?
Ùn hè micca un obligu di cunnosce u corsu quand’ellu si sceglie di mette u so figliolu à Scola Corsa, ma hè assai megliu di mettecisi ! I zitelli sò ancu di più mutivati. Puderete discorre cun elli di ciò ch’è vo amparate l’unu l’altru. Cusì, serà da veru un arricchiscimentu per voi.
Parechje ozzione si pruponenu à voi per aiutavvi in st’amparera. S’ella vi garba d’amparà in gruppu, avete pensatu à i corsi organizati da Praticalingua ? Esiste siguramente una Casa di e lingue vicinu à ind’è voi.