ASSUCIASSI per fà scola inseme
In una scola assuciativa, tuttu ognunu hà u so rollu : i zitelli vanu in scola, l’insignante è insignanti facenu scola è e famiglie facenu funziunà a scola. St’indiatura cullettiva porta un suplementu d’anima à l’aventura ; cusì, a scularità di i zitelli hè gratisi.
Quand’elli scrivenu i so figlioli, i parenti d’elevi diventanu di manera automatica membri di dui associ : l’associu chì gestisce a scola di i so figlioli è a federazione Scola Corsa chì addunisce tutti i stabilimenti sculari di Scola Corsa. Di fatti, segondu i statuti di Scola Corsa, i parenti è e persone chì anu l’autorità parentale di l’elevi sò membri di u retale.
In una scola cusì, ci vole à mette e mane in pasta
« Un associu ùn hè solu una forma ghjuridica, hè dinù un statu di spiritu. Vale à dì, è face parte di i nostri valori, ch’è no semu sulidarii l’unu di l’altru », spiega Ghjiseppu Turchini, presidente di a federazione è di u retale Eskolim. Ùn si pò stà senza fà nunda. Senza l’impegnu di i parenti, u sistema ùn funziona, ci vole à mette e mane in pasta.
L’impegnu di e famiglie si face di manera naturale, à u ritimu è segondu i gusti d’ognuna è d’ognunu. Travagliucci manuali, animazione d’attelli perisculari, organizazione d’evenimenti… Ùn sò micca l’occasione chì mancanu. Pè e chermesse o e feste, ognunu a si prova à preparà biscotti o migliaccioli, à vende li dinù. Compia a festa, ci hè sempre bisognu d’aiutu per dà una pulità è allucà… ci hè impegnu per tutti !
A VITA ASSUCIATIVA, IN PRATICA
Per mette à dispusizione di a scola tempu, cumpetenze, o forza di e bracce,
ci vole à tenesi infurmatu. Per quessa :
• seguità l’attualità nant’à i tavuloni affissati in scola, nant’à e rete suciale, u blog o u situ internet ;
• leghje i mail di a scola è di l’associu ;
• scrivesi nant’à i planning di i benevulenti ;
• participà à l’assemblea generale o à l’appuntamenti di l’associu ;
• parlà cù a direzzione o i membri di a squadra di l’insignanti ;
• parlà cù l’altre famiglie chì cunnoscenu digià a scola.
È dinu leie
« A scola hè gratisi in soldi, ma ùn hè micca gratisi in tempu, a ghjente deve impegnassi per falla funziunà è circà di purtalli appena di soldi », spiega Sébastien Antoniotti, presidente di Sarrula è Carcupinu.
Antone, parente d’elevu in una scola di Bastia a dice anch’ellu : « Ciò ch’ellu si scopre in Scola Corsa hè l’aiutu, a spartera, a sulidarità. Passemu mumenti felici, è mumenti più difficiuli perchè u benevulatu pò esse stancante. Ma sapemu perchè a femu, ci impegnemu in a scola di i nostri figlioli. St’ogettivu cumunu à tutti i parenti face ch’elle si sviluppanu leie d’amicizia è quessa hè una ricchezza. Scola corse tesse leia.
À l’accorta, a forza di Scola Corsa, hè a forza di i so membri !