Retale di scole assuciative insignante, in immersione linguistica, e lingue regiunale o minuritarie di Francia, Eskolim conta oghje circa 11 000 elevi in 183 stabbilimenti.
Eskolim hè un associu chì addunisce i retali di scole assuciative insignante in lingue regiunale o minuritarie di Francia in immersione linguistica. Creata in u 2009, oghje conta sei retali : Seaska (bascu), Diwan (brittonu), Calandreta (occitanu), ABCM-Zweisprachigkeit (alemanu è alsazianu), La Bressola (catalanu) è Scola corsa (corsu). U retale Eskolim cuncoglie 183 stabbilimenti (scole, cullegi, licei) cun 10 711 elevi.
Presidente è presidenti di e scole di u retale Eskolim
Yann Uguen, presidente di Diwan, Ghjiseppu Turchini, presidente di Scola Corsa è d’Eskolim, Karine Sarbarcher, presidente d’ABCM Zweisprachigkeit, Antton Etxeberr, copresidente di Seaska, Jean-Louis Blenet, presidente di Calandreta è l’ISLRF, Guillem Nivet, presidente di Bressola, Erik Etxart, copresidente di Seaska è Sophie Layus, copresidente di Seaska.
Durante l’assemblea generale di u 23 marzu 2025 in Carcassone.
Tempu creata Scola Corsa hà integratu u retale Eskolim. Ci hà permessu di rinfurzà a nostra dimarchja educativa ispirendusi di i metudi pruvati da altre federazione membre, chì sò riesciute à sviluppà mudelli d’insignamentu perfurmanti è ricunnisciuti.
Fà parte d’Eskolim porghje à Scola Corsa un sustegnu cullettivu in a so missione di ricunniscenza è di preservazione di a lingua corsa, benefiziendu d’una visibilità accrisciuta è d’una cullaburazione cun d’altri attori impignati in a listessa causa. Stu partenariatu ci permette dinù di cuntribuisce à un muvimentu naziunale pè a difesa di e lingue regiunale, è à tempu d’adattà e specificità culturale è linguistiche di a Corsica à e pratiche pedagogiche e più bone.
Eskolim cerca di prutege è di valurizà e lingue regiunale integrendule cum’è lingue principale d’istruzzione à l’età a più chjuca, ciò chì permette à l’elevi d’ammaistrà a lingua regiunale, in più di u francese è ancu certe volte d’altre lingue..
| RETALE ESKOLIM in 2025 | Numeru d’elevi | Numeru di stabbilimenti |
| Seaska • Paese Bascu | 4 344 elevi | 39 ikastola |
| Bressola •Catalogna | 1 070 elevi | 9 stabbilimenti |
| Diwan • Brittagna | 3 915 elevi | 53 stabbilimenti |
| Calandreta• Occitania | 3 937 elevi | 65 calandreta |
| Zweisprachigkeit•Alsazia-Musella | 1 137 elevi | 13 scole |
| Scola Corsa • Corsica | 223 elevi | 4 scole |