E scola Scola corsa sò uniche per via di l’immersione tutale in lingua corsa (100 % di u tempu passatu in scola). Ma dinù per via di l’adopru d’una pedagugia aperta chì porghje un’andatura educativa è questa valurizeghja u travagliu di gruppu, a creatività è a spressione libera.

Scola corsa hè una scola in immersione integrale. Vole dì chì u corsu hè adopratu tutta a ghjurnata. Cusì, u zitellu hè ciuttatu in un bagnu linguisticu da a mane à a sera, in tutte e materie insignate (fora di u francese), è ancu à a cantina o in ricriazione. Di fatti, in l’amparera d’una lingua, u tempu di spusizione hè impurtante assai. À Scola corsa l’inseme di i riferenti adulti parlanu è adopranu u corsu, durante tutta a ghjurnata di scola.
Una scola immersiva, ella, prupone un tempu significatu di spusizione à a lingua corsa senza chì l’immersione sia tutale.
In una scola bislingua, e materie sò insignate sia in francese, sia in corsu.

U metudu d’immersione integrale (o tutale) hè cunsideratu cum’è u metudu d’insignamentu u più efficace per acquistà una lingua. I zitelli sò ciuttati in un bagnu linguisticu cuntinuu. U corsu hè adopratu di manera sistematica, in parallelu à francese chì ferma, fora di a scola, a lingua di riferenza di a sucetà. Grazia à st’immersione, l’elevi diventanu lucutori bislingui attivi, vale à dì cumpetenti in corsu cum’è in francese. Cun stu metudu, u zitellu face in furia  l’acquistu di duie lingue : dui tesori linguistichi.  

I studii a dicenu tutti : i zitelli plurilingui, in più d’esse i più forti in l’amaistrera di e lingue, anu dinù risultati superiori in l’altre discipline. I risultati ottenuti à u basciliè in i licei immersivi baschi è brittoni di u retale Eskolim ne sò a prova. Figuranu in i migliori stabilimenti à u livellu naziunale.

L’amaistrera prumaticcia di lingue hè una carta maestra pè i nostri zitelli chì adulti di dumane.
Essendu stimulatu di più u cerbellu, u plurilinguisimu favurizeghja a memoria, a cuncentrazione è a capacità à risolve i prublemi. Ghjuchendu cun parechji sistemi linguistichi, l’elevi rinforzanu a so vivacità mentale, ciò chì li permette di strutturà megliu u so pensà è d’accustà situazione cumplesse cun di più flessibilità. Sò ampiificate e so rapidità intellettuale, e so capacità d’analisi è e so capacità à ragiunà.
I scentifichi anu pussutu dimustrà chì i zitelli chì parlanu almenu una segonda lingua presentanu cumpetenze intellettuale di più sviluppate.
A lingua corsa hà da permette à i zitelli d’accede à cumpetenze linguistiche chì i monolingui ùn anu.
L’amparera prumaticcia di e lingue da i zitelli li permette dinù d’avè una più bona stima di sè stessu è un sguardu pusitivu nant’à e so cumpetenze è e so capacità à pudè amparà. Da chjuculelli, i zitelli anu menu appreensione è inibizione di pettu à ciò chì ci hè di scunnisciutu.
In più di sti benefizii pè u sviluppu cugnitivu è l’equilibriu psicologicu, s’aghjusta una dimensione suciale. U fattu d’amparà parechje lingue, hè dinù apresi nant’à d’altre culture, è dunque integrà nuzione di tulleranza, d’accettazione di l’altru è di differenza.

A pedagugia purtata in e scole Scola corsa mette l’incalcu nant’à l’amparera cù a sperienza, a cuuperazione in classa, a spressione libera è l’amparera di a vita suciale. Ogni settimana, per esempiu, i zitelli si riuniscenu pè discorre trà d’elli, durante un cunsigliu d’elevi, di e dumande intornu à a vita di a scola. Cuntrastanu è portanu suluzione di manera cullettiva.

Iè. E scole Scola corsa seguitanu u percorsu naziunale francese, integrandu l’insignamentu di u corsu è di a cultura corsa, purghjendu un’educazione bislingua è biculturale.

Per via di e so classe à dimensione umana è un’avvicinanza pedagogica chì valurizeghja u gruppu, l’insignanti di Scola corsa seguitanu da vicinu u sviluppu accademicu è persunale d’ogni elevu, assigurendu un sustegnu adattatu à i so bisogni.

Cum’è in l’insignamentu publicu, l’insignanti anu seguitatu un percorsu à l’INSPE (institut national supérieur du professorat et de l’éducation) è ottenutu, à u minimu, un master primu gradu « Prufessuratu di e scole ». I stitutori è stitutrici anu dinù ottenutu a certificazione di corsu.

L’amparera di u francese si face in francese. Hè intruduttu in a scularità à partesi da u CE1, quandu i zitelli amparanu à leghje è scrive in francese. A cunniscenza di a lingua corsa scritta li permette di fà i prugressi in furia perchè chì i zitelli anu digià acquistatu i meccanisimi di lettura è di scrittura.

Seguitendu a scularità, certi insignamenti si facenu dinù in francese è una parte di u prugramma, è a piazza di u spartitempu settimanale cunsacratu à u so studiu cresce, di manera cunforma à u prugramma uffiziale di l’Educazione naziunale.

2 ore à settimana à u CE1. L’oghjettivi di lettura è di scrittura essendu stati raghjunti, ste duie ore sò praticamente guasi cunsacrate à perfezziunà a lettura in francese.
4 ore è 15 à settimana à u CE2. U studiu di e specificità di a lingua francese hè tandu di più in più impurtante.

5 ore à settimana in classe di CM pè u studiu di a lingua è a literatura. S’aghjusta un’ora di matematiche in francese.
À partesi da u CM1, una parte di e ricerche ducumentarie si face in francese. Sta capacità à utilizà di manera indiferente fonte ducumentarie in corsu o in francese cuntribuisce à raghjunghje l’oghjettivu in fine di CM2 è a finalità di u travagliu in immersione, à sapè u bislinguisimu equilibratu.

Di siguru. L’insignamentu hè dispensatu « in u rispettu tutale di a libertà di cuscenza » è « tutti i zitelli senza distinzione d’origine, d’upinione o di credenze » ci anu accessu.

Tutte e scole Scola corsa anu vucazione à esse cuntrattualizate cù u Statu è d’esse, cun stu regime, assuciate à u serviziu publicu.

In stu cuntrattu, i partiti piglianu impegni l’unu è l’altru. Scola corsa s’ingagia à ciò chì u so insignamentu sia in cunfurmità cù i prugrammi definiti da u ministeru di l’Educazione naziunale, ch’ellu sia fattu « in u rispettu tutale di a libertà di cuscenza » è chì « tutti i zitelli senza distinzione d’origine, d’upinione o di credenze » ci avessinu accessu. In ritornu, u Statu assume e listesse cariche ch’è pè i stabilimenti publichi è sopr’à tuttu a paga di l’insignanti.

Eppuru, nanzu à a signatura di u cuntrattu, u Statu impone cinque anni di prubazione è durante quelle, osserva, ispetta è cunvalida u funziunamentu di e scole è di e classe.

I stabbilimenti devenu fà a dimustrazione di a so efficacità in materia d’insignamentu è d’amparera. Hè una manera di dà guaranzie à i parenti genitori per ciò chì tocca à l’inguatramentu è i metudi pedagogichi, ma hè dinù un mumentu obligatoriu per benefizià di u sustegnu finanziariu di u Statu.

I raporti di l’ispettori di l’Educazione naziunale anu insistitu nant’à a qualità di l’insignamentu à Scola corsa, e classe aperte in Bastia è Biguglia in u 2021 sò state cuntrattualizate e prime.

I studii ùn mancanu, ancu quelli chì venenu da l’Educazione naziunale : mettenu in risaltu i benefizii ch’elli anu i zitelli chì anu seguitatu un percorsu d’insignamentu immersivu. Sti studii a dicenu tutti : i zitelli plurilingui ùn sò micca solu boni in a maestria di e lingue, anu dinù risultati superiori in l’altre discipline.
U percentuale di riescita à u basciliè ottenutu in i licei baschi è brittoni ne sò a prova. Sò frà i più boni à u livellu naziunale. I 99% di riescita à u brevettu è 95,7% à u basciliè (chì a maiò parte di e prove si facenu in francese),mostranu bè chì u livellu in francese hè mantenutu à ogni tappa di a scularità.

U prugramma di studiu di u francese à Scola corsa permette di ghjunghje stu raportu tempu in fine di scola primaria : dui terzi in corsu è un terzu in francese. Sta prupurzione sbocca nantu à un bislinguisimu equilibratu trà e duie lingue. A sperienza d’altre scole di u retale Eskolim dimostra chì i zitelli anu un livellu equivalente in a maestria di a lingua francese à quellu di i zitelli scularizati in francese.

U plurilinguisimu, a pedagugia attiva, l’effettivi chjuchi di e classe, l’impegnu di i parenti facenu chì e scole Scola corsa sò lochi girati ver’di a riescita. L’esempiu d’altre scole di u retale Eskolim hè quì per mettelu in risaltu. I risultati ottenuti à u basciliè in i licei immersivi baschi è brittoni facenu parte di i migliori à u livellu naziunale.

In una scola assuciativa, tuttu ognunu hà un rollu : i zitelli vanu in classa, l’insignante è insignanti facenu scola è e famiglie facenu funziunà a scola à traversu un associu lucale. St’impegnu cullettivu porta un supplementu d’anima à l’aventura ; è cusì, a scularità di i zitelli hè gratisi. L’impegnu di e famiglie si face di manera naturale, à u ritimu è segondu i gusti d’ognuna è d’ognunu. Travagliucci manuali, animazione d’attelli perisculari, organizazione d’evenimenti… Ùn sò micca l’occasione chì mancanu.

Bella sigura, hè sempre megliu quandu i parenti o i babboni è mammoni (o caccari è caccare!) ammaistreghjanu a lingua. Ma ùn hè micca indispensevule. U più impurtante, pè u zitellu, hè a mutivazione è l’incuragimenti ch’è vo li purterete spieghendu a vostra scelta di prugettu educativu. S’è vo ùn parlate micca corsu, u zitellu hà una cumpetenza nant’à qualcosa chì i parenti ùn ammaistreghjanu micca. Hè forse appena distabilizante, ma hè bè pè u zitellu d’avè cose da amparà à i so parenti.

E scole Scola corsa sò aperte à tutte è à tutti.

Iè. Scola corsa hè un retale di scole gratisi è laiche.

Dopu à avè sceltu a mo scola, infurmatevi nant’à u calindariu d’apertura di e scrizzione. Spesu hè à u principiu di u terzu trimestru nanzu à a rientrata sculare. Dopu cuntattate a scola di a vostra scelta u più in furia pussibule (ci sò in generale assai dumande) pè sullicità a scrizzione di u vostru figliolu per l’annu à vene.

Iè. Ci vole à rinsignassi nant’à i prezzi in a scola di a vostra scelta. Di manera generale, sò i listessi ch’è quelli praticati in e scole publiche di a cumuna.

Iè. Queste quì cambianu segondu a scola. Rinsignatevi direttamente in l’associu lucale (vede a linguetta « sceglie una scola » in u menu di u situ).

A federazione Scola corsa hà cum’è vucazione d’aiutà a creazione di scole assuciative d’insignamentu immersivu in corsu, è di riuniscele, per custituà un retale in carica di a definizione di a pedagugia, di l’organizazione, di a furmazione di i persunali, di a so gestione.

A federazione pò dinù sviluppà attività di ricerca, d’edizione o di tutta altra attività chì và in u sensu di a difesa di u patrimoniu culturale corsu.

Inoltre, Scola corsa a federazione hè membre di l’associu Eskolim, (creatu in u 2009, pocu dopu a ricunniscenza di e lingue regiunale in a Custituzione francese) chì addunisce i sei retali (alsazianu, bascu, brittonu, catalanu, corsu, occitanu) di stabilimenti sculari assuciativi per immersione in lingua regiunale. Inseme, anu u scopu di fà ricunnosce l’immersione linguistica in l’insignamentu.

Oghje, cun 4 stabbilimenti è 9 classe, l’ecosistema di u retale Scola corsa currisponde à un bugettu attuale di 1,4 milioni d’euri. A Cullettività di Corsica assigura oghje 70 % di u finanzamentu necessariu à u funziunamentu di Scola corsa. Dece altri percentu sò dati da e cullettività lucale partenarie. Scola Corsa s’autofinanza à l’altezza di 20 %. Stu finanzamentu hè fattu di doni, individuali o intraprese chì volenu assuciassi à a dimarchja è sustenela.
A Federazione Scola corsa essendu gradita da u ministeru di e Finanze, ogni dunatore benefizieghja d’una reduzzione fiscale di 66 % di u so donu.
In cumplemente, ogni scola appoghja u so finanzamentu à l’attività organizate da l’associu lucale : animazione culturale, cunviviale o spurtive. L’associ di parenti racoglienu cusì soldi chì cuntribuiscenu à a gratuità di l’insignamentu.