U francese : un’evidenza

Dapoi a so nascita, l’elevi sò ciuttati in una cultura à duminante francòfuna, sentenu è vedenu u francese ogni ghjornu. Una scularità in corsu serà senza cunseguenza nant’à l’amparera di u francese. À u cuntrariu, li permette d’acquistà di più mezi di cummunicà è di fassi capisce.

A lingua cutitiana di u zitellu

Malgradu a piazza fundamentale di u corsu in a scularità Scola corsa, i zitelli tenenu una leia forte assai cù a lingua francese. Hè presente di manera cutitiana in a so vita, sopr’à tuttu fora di a scola induve i zitelli passanu a maiò parte di u so tempu di svegliu. Di fatti, malgradu l’immersione in corsu, solu 15 à 20 % di a vita sveglia di u zitellu s’hà da passà in corsu.

Tocca a scola primaria, u bislinguisimu arricchisce è cumpletta a presa di parolla in francese di i zitelli. Quandu un zitellu si sprime di manera spuntanea in francese è chì l’insignante li dumanda di rifurmulà in corsu, a ferà à contu d’una riflessione pensendu à a ghjustezza di ciò ch’ellu hà dettu subbitu avà. Riflette pè turnà à sprimesi in un’altra lingua aiuta à apprezianne a cuerenza, a scelta di u vucabulariu, a precisione, a sintassa… Ùn ripete micca e parolle ch’ellu vene di prununzià ma s’appoghja nant’à e so cunniscenze in e duie lingue per truvà un’altra manera di spiegà ciò ch’ellu vole veramente dì. I zitelli scoprenu ch’elle ci sò duie manere differente di numinà listessa cosa. Ne ghjocanu, prima perchè i face ride, è dinù perchè l’aiuta à capisce u funziunamentu di e lingue per cunnoscele megliu è adopralle. Hè dinù in sta cumplementarità di e duie lingue, mentre in l’amparere prumaticce, chì i zitelli arricchiscenu di manera prugressiva e so capacità à cumunicà, puru in francese, a so lingua materna.

Pè i zitelli di u retale Eskolim, i risultati di l’esami naziunali chì a maiò parte di e prove si facenu in francese, dimostranu chì u livellu in francese hè mantenutu à ogni tappa di a scularità.

Un’amaistrera bona di u u francese

A sperienza d’altre scole di u retale Eskolim dimostra chì i zitelli anu un livellu d’amaistrera di lingua francese equivalente à quelli di l’elevi scularizati in francese. Hè di modu naturale in francese ch’ellu s’insegna a materia francese, in u rispettu di i prugrammi di l’Educazione naziunale. È s’ellu si riferisce à l’altre scole di u retale Eskolim, i risultati ottenuti à l’esami (99 % di riescita à u brevettu è 95,7 % à u basciliè in u 2018) chì a maiò parte di e prove si facenu in francese, mostranu bè chì u livellu in francese hè mantenutu à ogni tappa di a scularità.