Hè cù una grande gioia ch’ella hè stata accolta a nutizia : tocca a rientrata sculare 2025, u retale di e scole Scola corsa entra sott’à cuntrattu cun l’Educazione naziunale. Cunferenza di stampa…
Lettura : 4 mn
« Hè un’era nova chì principia per noi » dice Ghjiseppu Turchini, presidente di Scola corsa durante a cunferenza di stampa di stu ghjornu. Toccu settembre 2025, un cuntrattu d’assuciazione trà l’Educazione naziunale è u retale d’insignamente immersivu Scola corsa entrerà in ballu. Di manera cuncreta, a paga di dui insignanti di e scole di Bastia è di Biguglia serà pigliata in carica da u Statu, à partesi da a prussima rientrata sculare.
Sta cuntrattualizazione anticipata hè stata di modu ufficiale validata u 14 di maghju scorsu. Intervene à capu di u quartu annu di funziunamentu di Scola corsa è micca dop’à l’abituali cinque anni aspettati di solitu, in u rispettu di u periudu dettu « prubatoriu » impostu da u Statu.
« Sta decisione vene à ricumpensà u seriu è a fiabilità d’una dimarchja custruita intornu à a laicità, a gratuità, l’esigenza è u rispettu di l’aspettati pedagogichi di a scola publica, cuntinuveghja u presidente di Scola corsa (è dinù presidente d’Eskolim). Ci vidimu un segnu da veru incuragente di ricunniscenza di u nostru mudellu chì currisponde à una dumanda sucetale, patrimuniale è linguistica forte. »
L’oghjettivu hè a cuntrattualizazione di tutte e scole Scola corsa, spiega Anna Catalina Santucci, cuurdinatrice generale di l’associu, à a tribuna cun Ghjiseppu Turchini, presidente di Scola corsa.
Sta decisione vene ricumpensà u seriu è a fiabilità d’una dimarchja custruita intornu à a laicità, a gratuità, l’esigenza è u rispettu di l’aspettati pedagogichi di a scola publica.
A cuntrattualizazione apre pruspettive nove
« St’era nova ci imposta di fatti à u core di u dispusitivu accademicu regiunale è territuriale. A cuntrattualizazione ci apre perspettive nove : una terza via à u cuncorsu di u prufessuratu di e scole, a cullaburazione cun l’INSPE è l’università di Corsica, l’apertura d’una furmazione specifica, l’accuglienza di stazianti in u guatru di a riforma in corsu di i masters di furmazione iniziale di i prufessori…
Simu pronti à integracci à l’architettura evulutiva di u prugettu in corsu d’elaburazione, priservendu à tempu l’originalità di a nostra dimarchja è u nostru rollu di laburatoriu sperimentale. »
Un’entità assuciativa chì prupone un’offerta di serviziu publicu.
« Cum’è i cinque altri retali d’Eskolim (Diwan, Seaska, Calandreta, La Bressola, ABCM) custituimu oramai un’entità assuciativa chì prupone un’offerta di serviziu publicu, ci hà spiegatu u presidente di u retale Scola corsa. Eppuru, a primura hè di securizà l’inseme di l’insignamentu immersivu assuciativu chì ferma sottu à a minaccia di l’arrestu resu da u Cunsigliu custituziunale dop’à u votu chì hè statu malgradu tuttu largamente favurevule à l’Assemblea naziunale nant’à a lege Molac. »
« Ci appruderemu di purtà a nostra petra à l’edifiziu in materia d’insignamentu di a lingua corsa è d’alimentà a riserva necessaria di i futuri insignanti »
« Avemu da impignacci à prupone piste à i servizi prefetturali, retturali è territuriali ; e discussione in corsu in quant’à l’evuluzione legislative essendu sicuramente di natura à favurisce suluzione à longu andà. Ci impignemu di purtà a nostra petra à l’edifiziu annunziatu da u Sgiò Rettore in materia d’insignamentu di a lingua corsa è d’alimentà a riserva necessaria di i futuri insignanti indispensevule à ogni pulitica ambiziosa.
Hè sicura chì u nostru ritimu di criscenza deve mantenesi, à tempu à u dispusitivu di u serviziu publicu. L’oghjettivu deve andà ver’di una crescita di u numeru d’elevi scularizati in un bislinguisimu appaciatu è spannante, una vera ricchezza in u mondu d’oghje. »
Oghje, l’insignanti di Scola corsa sò cuntrattuali. Oramai anu da pudè passà un cuncorsu naziunale.
U sviluppu di u retale cun l’apertura d’una scola in Lucciana
Altra attualità impurtante per Scola corsa ; l’apertura di u situ novu di Lucciana. « In piena cuncertazione cù a municipalità, pudemu annunziavvi a creazione d’una scola materna immersiva chì accoglierà elevi di TPS (très petite section) è di piccula sezzione », sviluppa Anna Catalina Santucci, cuurdinatrice di l’associu. E scrizzione sò aperte, i parenti interessati ponu cuntattà à Scola corsa o i servizi di a merria chì trasmetteranu e dumande. Una riunione serà prestu organizata, cum’è di solitu à l’occasione di una impiantazione nova, pè risponde à tutte e dumande ch’elle si ponu pone e persone interessate.
Chjama à i doni, chì permettenu una deduzzione fiscale
A cuntrattualizazione, puru s’ella permette d’accede à fondi novi, ùn cambia nunda à a quistione di u finanzamentu à corta andatura. A parte d’auto finanzamentu ferma impurtante assai, à l’altezza di 20 % è dunque di parechje centinaie di millaie d’euro. Cun quattru scole è nove classe, u bugettu di Scola corsa s’alza à 1,4 milioni d’euro.
« Avemu più ch’è mai bisognu di a generusità di i particulari è di l’intraprese. Invitemu tutti quelli chì credenu in u nostru prugettu à susteneci », dice torna u presidente. I ringraziemu tutti, fidi meceni è dunatori novi in sta dimarchja, da u fondu di u core. »
Inseme, spannemu a nostra lingua !
Tenimu à salutà i sforzi di tutti quelli chì anu cuntribuitu à francà sta tappa fundamentale di u nostru sviluppu : u persunale amministrativu è insignante chì s’investisce senza cuntà in a riescita di stu dispusitivu, i parenti presenti assai in e so scole rispettive è in particulare i membri di i scagni di l’associ lucali, a CdC chì s’hè impignata di manera massiccia à fiancu à noi, e merrie chì ci accoglienu è cuntribuiscenu à u nostru cofinanzamentu, i sottuscrittori particulari è intraprese chì anu cuntribuitu anch’elli, i sgiò Prefetti di Corsica è Rettore di l’Accademia pè u so ascoltu attentu è primurosu, i nostri partenarii di u retale Eskolim à quale duvemu tantu.
Scola corsa – A Federazione