Una cinquantina di persone (parenti, aderenti, insignanti, amministrativi…) anu participatu u 14 di ferraghju, in i lucali di a Casa di e Scenze, in Bastia, à l’AG annuale di l’associu ingir’à à un bilanciu è à orientazioni chì cunfermanu l’arradichera dinamica di Scola corsa in a realità suciale isulana.
Nè una formalità assuciativa, nè un ritu annuale, l’assemblea generale di Scola Corsa di u 14 di ferraghju ùn hè stata un semplice appuntamentu statutariu. Hè diventata segnu chjaru di un muvimentu chì si spanna. Cinque anni. Solu cinque anni, è digià 200 zitelli scularizati in Bastia, Biguglia, Sarrula, Corti è Lucciana. Ogni annu una scola nova. Duie classe cuntrattualizate cù u Statu. A perspettiva seria d’una cuntrattualizazione generalizata. Un cuncorsu specificu apertu à l’insignanti impegnati in a strada assuciativa. È, puntu impurtante, l’intrata di u mondu ecunomicu in a dimarchja cù « L’impresa per a lingua ».
Ùn sò ciffri. Sò dimustrazione. A dimustrazione d’una maturità.
L’insignamentu in immersione tutale hè diventatu una risposta strutturata, urganizata, cridibule. Dà a so forma cuncreta à una vulintà cullettiva di trasmissione. È sta vulintà ùn hè nè folklore nè nustalgia. Hè rispunsabilità.
Rispunsabilità di pettu à l’erosione linguistica.
Rispunsabilità di pettu à l’uniformazione culturale.
Rispunsabilità di pettu à l’indifferenza.
Si tratta di sapè s’è una sucetà accunsente à purtà a so lingua cum’è una lascita viva, o s’ella s’inchina è a vede sparisce cun curtesia.
Tandu, sustene Scola Corsa hè sustene a vitalità culturale di a nostra isula. Hè suminà pè una generazione chì crescerà bislingua, plurilingua, cuscente di u so patrimoniu è aperta à u mondu. Hè affirmà chì mudernità è identità ùn sò da oppone – si rinforzanu.
Dopu à cinque anni, Scola Corsa ùn cerca più a so piazza : a piglia. S’arradicheghja. Si stabilisce. Ùn hè più l’ora di l’osservazione misurata. Hè l’ora di l’impegnu.