« L’immersione, hè una bella fiura ; vole dì ch’omu s’inciotta. È per amparà à nutà, ùn basta à ciuttassi solu per metà ! » Hè perfetta sta metafura. Vene da u presidente di l’Istitutu Superiore di e Lingue di a Republica Francese, centru di furmazione di u retale Eskolim, Joan Loìs Blenet, dinù copresidente di Calendreta, a scola assuciativa d’insignamentu immersivu di lingua occitana.

Eskolim hè un associu creatu in u 2009, ghjustu dop’à a ricunniscenza di e lingue regiunali in a custituzione francese. Addunisce oghje i sei retali di stabilimenti sculari assuciativi per immersione in lingua regiunale : Seaska (per u bascu), Bressola (u catalanu), Diwan (u brittonu), Calendreta (l’occitanu), ABCM Zwei Sprachigkeit (l’alzazzianu è l’alemanu cumunu) è Scola Corsa (u corsu.)

Inseme, sti retali anu ingeneratu un centru di furmazione cumunu, specificu à l’insignamentu immersivu, l’Istitutu Superiore di e Lingue di a Republica Francese. E furmazioni di i maestri chjamati à insignà sò decentralizate è affidate à i stabilimenti dedicati à ogni lingua. Ogni dui anni, i membri di l’ISLRF organizeghjanu un colloquiu nant’à a pedagugia immersiva in una di e regioni cuncernate induv’elli cuurduneghjanu è cunfrontanu e so sperienze, accatastanu sapè è uttimizeghjanu a so azzione in favore di l’immersione linguistica.

Eskolim hè custituitu da :

– Seaska in Paese bascu (4 001 elevi, 37 ikastola di settembre 2019),
– Bressola in Catalogna (1 031 elevi, 8 stabilimenti)
– Diwan in Brittagna (4 307 elevi, 55 stabilimenti),
– Calandreta in Occitania (3 937 elevi, 69 calandreta),
– ABCM-Zweisprachigkeit in Alzazzia-Musella (1 208 elevi, 12 scole),
– Scola corsa in Corsica (2 scole in corsu di creazione).

Di dicembre 2016 in Biarritz, Eskolim hà zifratu cù u Sindicatu naziunale di e radio libere (SNRL) una cunvenzione nant’à l’apportu educativu di e radio, cù una fucale nant’à a realità suciolinguistica è culturale di e lingue di Francia.

Pocu prima à a rientrata 2019, u cutidianu Le Monde hà publicatu un’inchiesta nant’à e nostre scole in immersione chì mancanu di mezi è « crollanu da a dumanda ».

Scola Corsa, cù i so partenarii di u retale Eskolim, riclama una ricunniscenza di l’insignamentu immersivu da u Statu.