U tempu corre ed eccuci digià à a sesta rientrata di Scola corsa. Sei annate di custruzzione, di passione è di suddisfazione.
Ghjudicate voi :
- 260 elevi
- I nostri primi CM1 cù a perspettiva vicina di u cullegiu da creà
- 38 impiegati trà i quali 19 insignanti è 17 animatrici, 2 amministrativi
- 6 siti (Bastia, Biguglia, Sarrula, Corti, Lucciana) cù l’apertura quist’annu di a
nostra prima scola in ambiante rurale, in Serra di Fiumorbu. - 8 posti cuntrattualizati è 5 altri prumessi in 2027.
- A nostra prima laureata à u cuncorsu specificu di u retale assuciativu immersivu
Iè, ci hè propiu da rallegracci da ciò chè n’emu acquistatu tutti inseme.
In u nostru retale s’accerta ghjornu à ghjornu una pedagugia adatta, originale, chì si dimostra valida grazia à l’impegnu di e (i) nostre(i) maestre(i) è chì susciteghja un’addesione sucetale criscente. L’animatrici cullabureghjanu cù l’insignanti da ottimizà u dispusitivu prupostu, da a guarderia è a cantina sin’à l’attività perisculari. S’investiscenu i parenti cù generosità è efficacità è ci aiutanu centianie di mecenati, intraprese è particulari, rinfurzendu a nostra dimarchja.
Ci sò sempre à latu, cù un sustegnu fidu, a Cullettività di Corsica è e merrie accuglienti.
Infine, hà datu i so frutti a nostra mubilizazione di u veranu scorsu. L’Esecutivu di a CdC, mandatu da i gruppi unanimi, hà ripigliatu i neguziati cù l’auturità statali da assigurà l’ingagiamentu di u finanziamentu previstu è l’ottenimentu d’una planificazione d’un
sviluppu à long’andà, scritta in un quatru pluriannuale.
Più ch’è mai, preghemuci una strada fiurita, nant’à i chjassi di l’amparera è di u spannamentu.
Chì più bellu prugettu ch’è custruisce, adduniti, l’avvene d’una giuventù forte di u so sapè ?